SIONE UKADHANI.

SIONE UKADHANI.
1.
Sione nimenyamaza, mwenzio sina furaha,
Mambo ulo yatangaza, mie yanipa karaha,
Allah aniongoza, ulidhani nitahaha,
Waja ndio walewale, hakika hayana budi.
2.
Sione nimetulia, moyoni nahangaika,
Mwenzio nafikiria, namna ya kuongoka,
Ubaya wanifanyia, inshallah tastirika,
Waja ndio walewale, hakika hayana budi.
3.
Sione natabasamu, moyoni naungulika,
Nikiwaza sina hamu, mambo yalivyo pinduka,
Mie nimepigwa bomu, najuta kumchunuka,
Waja ndio walewale, hakika hayana budi.
4.
Sione nimeduwaa, ujue ninayajenga,
Hata niipate taa, lipendeze langu anga,
Wajashikwa na butwaa, zipotee zako ngenga,
Waja ndio walewale, hakika hayana budi.
5.
Sione sijakujibu, sidhani sijalipata,
Umetumwa si ajabu, fikisha umenikuta,
Sema halinipi tabu, si joto likafukuta,
Waja ndio walewale, hakika hayana budi.
6.
Sione abwata juu, yupo alo mpandisha,
Hata kwa yake miguu, na ngazi ya kuegesha,
Mgude sio chuguu, kobe hawezi pandisha,
Waja ndio walewale, hakika hayana budi. 

Dotto Rangimoto Chamchua.(Njano5)
255762845394/255784845394
mzalendo.njano5@gmail.com
Morogoro Tanzania

WAAFRIKA TUNA MAMBO.

WAAFRIKA TUNA MAMBO.                                            
1.
Mwajua mimi sijambo, namshukuru manani,
Nimeamka kitambo, shafika kibaruani,
Ila kuna kubwa jambo, kuuliza natamani,
Hivi nyie hamjambo? Mliopo kisimani.
Waafrika tuna mambo, nawambia si utani.
2.
Mambo yakiwa si mambo, siweke fundo moyoni,
Kubwa sicheke utumbo, kwa maini ya jirani,
Sitaki ule makombo, kwa hamu ya biriani,
Bure taitwa mtambo, mwenye wazimu rasini.
Waafrika tuna mambo, nawambia si utani.
3.
Kuna mambo ya mkumbo, kuyafuata acheni,
Mambo mengine urimbo, mchunge siwanaseni,
Kijana kimbie ng'ambo, nchini abaki nani?
Mwisho apigwe taimbo, kwa bata za ghaibuni.
Waafrika tuna mambo, nawambia si utani.
4.
Memkumbuka Setembo, babu yangu wa moyoni,
Aliniusia mambo, kuwaambia natamani,
Rijali haumwi tumbo, wala chango kinenani,
Hakika hafanyi tambo, bila vitendo jueni,
Waafrika tuna mambo, nawambia si utani.
5.
Nawasema wa kiambo, hata wale wa mjini.
Mlioamkia tembo, mloiota ndotoni,
Hamkuogeshwa jimbo, wakati wa utotoni,
Sawa mfanye utumbo, subuhi mko hewani,
Waafrika tuna mambo, nawambia si utani.
6.
Twasisitiza kimombo, kiswahili taabani,
Vizuri kuiga mambo, si kila kitu jamani,
Sawa kuacha kiyombo, kwa suti za Marekani,
Kukiabudu kimombo, ni wazimu jueni.
Waafrika tuna mambo, nawambia si utani.
7.
Kanisani kuna mambo, pia na msikitini,
Tuna itukana gombo, nalia utamaduni,
Miungu kutoka ng'ambo, Ulaya na Arabuni,
Imetupiga kikumbo, jadi haina thamani,
Waafrika tuna mambo, nawambia si utani,
8.
Tufani yapiga sambo, istizai yafaani,
Mjue twaenda kombo, naomba zindukeni,
Sote tumelewa tembo, kutoka ughaibuni,
Sasa ni wana wa kambo, baba wa kijerumani
Waafrika tuna mambo, nawambia si utani.
9.
Nimesema kimafumbo, hilo kwanza lijueni,
Maneno haya si shombo, ukutani andikeni,
Msiyafiche kwa rambo, hadharani yawekeni,
Jeuri ataka fimbo, awekwe sawa jamani,
Waafrika tuna mambo, nawambia si utani.
10.
Nimeliza la mgambo, lengo mtoke shimoni,
Ninawaita kwa wimbo, wahafidhina njooni,
Mwanagenzi nina mambo, majagina nifunzeni,
Naomba nifunge gombo, nilosema yashikeni,
Waafrika tuna mambo, nawambia si utani.

Dotto Rangimoto Chamchua(Njano5.)
Mzalendo.njano5@gmail.com
0784845394/0762845394
Morogoro Tanzania.

MWANANGU SITAKABARI

MWANANGU SITAKABARI                                      
                           
1.
Mwanangu ewe mwanangu, leo nataka kulonga        
Kila jambo lina Mungu, heri na shari hupanga,
Tamu ligeuke chungu, asali iwe pakanga,
Dunia hino dunia, mwanangu sitakabari.
2.
Mwanangu sicheke ufa, kumbuka kuna Jalia,
Siringe kutaka sifa, kiburi ukajitia
Aliye na afya hufa, mgonjwa akabakia,
Dunia hino dunia, mwanangu sitakabari.
3.
Mwanangu hebu elewa, nakuomba zingatia,
Ugonjwa ni majaliwa, mauti ni yetu njia,
Hupona mkusudiwa,hufa mshika jambia,
Dunia hino dunia, mwanangu sitakabari.
4.
Mwanangu naomba shika,nisemayo sio siri,
Haya yamethibitika, kitambo tena dahari,
Mbichi unanyauka, mkavu una nawiri,
Dunia hino dunia, mwanangu sitakabari
5.
Mwanangu sifanye ngenga, usitambie ukwasi,
Mambo ukiyabananga, tamkufuru Qudusi,
Mbio hushinda kinyonga, aachwe mbali farasi,
Dunia hino dunia, mwanangu sitakabari.
6.
Mwanangu usiwe chizi, cheo huwezi miliki,
Nataka ujue wazi, hakina hatimiliki,
Chifu awe mjakazi, mtumwa awe maliki,
Dunia hino dunia, mwanangu sitakabari.
7.
Mwanangu yana Karima, kupanda hata kushuka,
Uwende mbele na nyuma, ufanye unavyotaka,
Mla chunga hula nyama, mla nazi hula daka,
Dunia hino dunia, mwanangu sitakabari.
8.
Mwanangu sicheke mamba, nawe mto hujavuka,
Kwa kiburi ungatamba,hupindui la Rabuka,
Hukosa aliyeomba, hupata asiyetaka,
Dunia hino dunia, mwanangu sitakabari.
9.
Mwanangu sifanye inda, aliyepewa kapewa,
Ujue heri ya shinda, kiumbe ulojaliwa,
Ukijua vya kutenda, sisaahu kutendewa,
Dunia hino dunia, mwanangu sitakabari.
10.
Mwanangu niendelee, ama kikomo nitie,
Nilosema sichezee, wallahi sipuuzie,
Kitaka uogelee, wasia uzingatie.
Dunia hino dunia, mwanangu sitakabari.

Dotto Chamchua Rangimoto.(Njano5)
784845394/762845394
Mzalendo.njano5@gmail.com
Morogoro Tanzania.

SINA HIYARI,SIKO MWENYEWE.

SINA HIYARI,SIKO MWENYEWE.
1
Swadakta kaka Mwimbe,kongole rafiki yangu,
Kwanza karibu mkembe,mlenda na nyanya chungu,
Sharubati ya maembe,yakungoja ndugu yangu.
Natunga yalo nisibu,mengine nabahatisha.
2
Hiyo heshima ya kwetu,ndugu nilokupatia,
Chakula hicho ni utu,na mahaba asilia,
Kukupa nimethubutu,ujue menivutia,
Natunga yalo nisibu,mengine nabahatisha.
3
Upupu uloniweka,leo nautia kucha,
Mama aliponitoka, naye baba kuniacha,
Ndipo mengi yakazuka, yasolitosha pakacha,
Natunga yalo nisibu, mengine nabahatisha.
4
Mambo yakawa magumu,hakuna mfano wake,
Kila nifanyalo sumu,niso jua ponyo lake,
Nikaomba kwa Karimu,anihafu mja wake,
Natunga yalo nisibu,mengine nabahatisha.
5
Ukaja umaamumu,niso jua chanzo chake,
Vidonge na talasimu,nikapewa usitoke,
Hivyo ikanilazimu,masomo nipumzike,
Natunga yalo nisibu,mengine nabahatisha.
6
Kichwa cha chezo chauma,wallahi kinatatiza,
Nikaanza kulalama,na fahamu kupoteza,
MoroSeko nilisoma,kwa tabu nilimaliza,
Natunga yalo nisibu,mengine na bahatisha.
7
Haya yote si urongo,ni kweli yajulikana,
Pale shule ya Mazengo,vitimbi vikaja tena,
Nikatumbukia nyongo,kusoma sitaki tena,
Natunga yalo nisibu,mengine nabahatisha.
8
Sijui mauzauza,ama uwendaazimu,
Mrembo ajitokeza,asema shika kalamu,
Tena akasisitiza,asemayo ni muhimu,
Natunga yalo nisibu,mengine nabahatisha.
9
Peke yangu namuona,akizileta habari,
Nikaziandika sana,bila kuhisi hatari,
Kusoma alicho nena,kumbe ule ushairi,
Natunga yalo nisibu,mengine nabahatisha.
10
Sasa hamsini rasi,hamsini majinuni,
Ni kisa kichoakisi,yalotokea zamani,
Namshukuru Qudusi,bado niko duniani,
Natunga yalo nisibu,mengine nabahatisha.
11
Mimi sio mshairi,leo nataka mjue,
Napelekwa ka tairi,natamani nijiue,
Kufanya yaso hiyari,yataka moyo mjue,
Natunga yalo nisibu,mengine nabahatisha.
12
Swali ulio uliza,nahisi nimelijibu,
Kama sijatosheleza,sema usione tabu,
Dunia yaeleleza, kucheka usithubutu.
Natunga yalo nisibu,mengine nabahatisha.

Dotto Chamchua Rangimoto(Njano5)
mzalendo.njano5@gmail.com
0784845394/0762845394
Morogoro Tanzania.

NATAKA KURA! NATAKA KULA!

NATAKA KURA! NATAKA KULA!                               

1
Siku ya kupiga kura, naona imewadia
Zile kukuru kakara, ukingoni zafikia,
Zile siku za subira, ujue zajiishia,
Jumapili piga kura, mwenzangu nakuusia,
Hawa wanataka kula, wengine wasaka kura.
2.
Kwa kila masika tano, siku hii iko moja,
Hutangulia pambano, la hoja pia vihoja,
Hufanyika mikutano, watu wasikize hoja,
Kisha makubaliano, ya umma wote pamoja,
Hawa wanataka kula, wengine wasaka kura.
3.
Hiyo siku ni adhimu, bilashaka mnajua,
Ni siku yetu muhimu, viongozi kuchagua,
Ina mambo maalumu, vizuri tukayajua,
Sheria yatulazimu, kuzifata mwatambua,
Hawa wanataka kula, wengine wasaka kura.
4.
Taratibu kwa mstari, chumba utakifikia,
Muepuke kutafiri, hiyo siku nawambia,
Msianze kuhubiri, huko kuvunja sheria,
Tena silete habari, ya nani wampigia,
Hawa wanataka kula, wengine wasaka kura.
5.
Ukiwa kwa kituturi, sicheze pata potea,
Uzikumbuke ghururi, na kweli za wagombea,
Ndipo ukate shauri, pa vema kujiwekea,
Kura yako iwe siri, piga majibu ngojea,
Hawa wanataka kula, wengine wasaka kura.
6.
Sikiza msimamizi, sifanye upendeleo,
Tena sifanye ajizi, kutangaza matokeo,
Ulete maangamizi, sababu yenyewe cheo,
Tuvikumbuke vizazi, isitughururi leo
Hawa wanataka kula, wengine wasaka kura.
7.
Vema tufanye subira, hiyo siku ya uchaguzi,
Tena tusije wakera, wenzetu wasimamizi,
Ndugu sifanye harara, tusifanye uchochezi,
Polisi acha hasira, silete maangamizi,
Hawa wanataka kula, wengine wasaka kura.
8.
Pamoja na wangu usi, pana jambo tujadili,
Tuumize zetu rasi, kwa yanayo tukabili,
Nimeshikwa wasiwasi, kwa jambo la jumapili,
Kutawepo ufanisi, katika zoezi hili?
Hawa wanataka kula, wengine wasaka kura.
9.
Imekuwa kawaida, watu kutopiga kura,
Hawaioni faida, wanachojua hasara,
Wallahi waona shida, kuzifunga biashara,
Mtu atafuta ada, wataka apige kura?
Hawa wanataka kula, wengine wasaka kura.
10.
Tatizo hasa ni nini? hata watu wasitoke?
Wanaona tabu gani? vituoni wasifike?
Ama polisi semeni, ndio kisa watishike?
Pamoja tujadilini, tongotongo zitutoke,
Hawa wanataka kula, wengine wasaka kura.
11.
Niseme na wagombea, wenye kuomba kura,
Ninyi hupelekea, watu wasipige kura,
Yale wanotegemea, kuletwa na hizo kura,
Hakika yakitokea, watapenda piga kura.
Hawa wanataka kula, wengine wasaka kura.
12.
Naomba nichagueni, niwe wenu kiongozi,
Nina malengo jueni, ya kuwafuta machozi,
Hima hima kapigeni, ninyi ndio waamuzi,
Watu kwa kubwa imani, wana mpa uongozi,
Hawa wanataka kula, wengine wasaka kura.
13.
Akipewa usukani, anageuka bazazi,
Jimboni haonekani, anahama na makazi,
Haya sitoi kichwani, nimewahoji wakazi,
Heri pepo za kusini, kuliko za kaskazi,
Hawa wanataka kula, wengine wasaka kura.
14.
Anakifanya kiburi, akishakuwa kitini,
Hataki tena habari, za watu wake jimboni,
Kumbe zote ni ghururi, ahadi za kampeni,
Tena haoni hatari, kuikanyaga ilani,
Hawa wanataka kula, wengine wasaka kura.
15.
Hivi kura yafaani? kama hawafaidiki,
Masoko hawayaoni, ya mahindi na hiriki,
Wawindaji wa porini, na wavuvi wa samaki,
Nawaomba tambueni, uchaguzi hawataki.
Hawa wanataka kula, wengine wasaka kura.
16.
Nyumbani hakuna sima, paka acheza jikoni,
Tumbo linatomatoma, taweza panga foleni?
Tena yataka simama, jua lapiga usoni,
Hawaendi wamegoma, nadhani jichagueni,
Hawa wanataka kula, wengine wasaka kura.
17.
Kilio cha wakulima, ni hifadhi ya jamii,
Wavuvi pale Musoma, hawana hifadhi hii,
Hivyo hawapati bima, nisemacho sitanii,
Hakika wameshasoma, viongozi wasanii,
Hawa wanataka kula, wengine wasaka kura.
18.
Uchaguzi ulopita, ni kama vile hasara,
Watu wengi walipata, kadi za mpigakura,
Nini kilichowapata, hata wasipige kura?
Kipo walichotafuta, ni nyenzo ya biashara,
Hawa wanataka kula, wengine wasaka kura.
19.
Kikubwa kitambulisho, cha kuombea mkopo,
Tena na uthibitisho, wa mahala atokapo,
Hili ndio sababisho, la hicho chao kiapo,
Hata mfanye vitisho, hawata ligusa kopo.
Hawa wanataka kula, wengine wasaka kura.
20.
Kura moja ina nini? swali lataka jawabu,
Tena itabadili nini? hata ziniishe tabu,
Kura itafanya nini? apate kauli bubu,
Tena ina nguvu gani? hata fisadi atubu
Hawa wanataka kula, wengine wasaka kura.
21.
Maswali hayo makini, mwananchi tumjibu,
Kura moja ni thamani, ina nguvu ya ajabu,
Yaweza kupa Amani, au ikupe adhabu,
Ukose chakula ndani, la ununue kasabu,
Hawa wanataka kula, wengine wasaka kura.
22.
Punguzeni hasira, wananchi nawaomba,
Tena sifanye harara, sikio sitie pamba,
Wala sifanye papara, mafisadi kuwatimba,
Kuzila kuna hasara, walewale watatamba,
Hawa wanataka kula, wengine wasaka kura.
23.
Wino wangu wa thamani, ni wa njano tambueni,
Umekwisha wenzanguni, hata tone silioni,
Mwenye nao sinihini, naomba niazimeni,
Ya manjano zafarani, ndio ilo tufitini
Kama hamniamini, nawaaga kwaherini.

Dotto Chamchua Rangimoto(Njano5.)
0784845394/0762845394
Mzalendo.njano5@gmail.com
Morogoro Tanzania

ARAFA, SASA NAJA KILUNGA

ARAFA, SASA NAJA KILUNGA                       1.
Mie napenda mkembe, na mbuku wa kubanika,
Sipendi sima ya sembe, hata kuku wa kupaka,
Kisha nipate maembe, yenyewe yalo dondoka,
Mwenzenu naja Kilunga, Nyachilo nataka fika.
2.
Nitaanzia kwa Kwembe, anaye ishi Kiroka,
Sizipendi zake pombe, sema nimemkumbuka,
Ngoja nifike atambe, nduguye si amefika?
Mwenzenu naja Kilunga, Nyachilo nataka fika.
3.
Sitamuacha Msimbe, ndugu yangu mpendeka
Nyumba yake aipambe, afurahi wake kaka,
Kibwaya kwenye miembe, kiuliza umefika,
Mwenzenu naja Kilunga, Nyachilo nataka fika
4.
Kinole yuko Mtimbe, itanipasa kushuka,
Nyimbo za mbeta aimbe, na ngadu aende shika,
Kisha usiku atambe, ngano za kusadikika,
Mwenzenu naja Kilunga, Nyachilo nataka fika.
5.
Tegetero yuko Pembe, kwa uganga asifika,
Anaujua usembe, yu fundi wa kuzindika,
Memletea msembe, hisani nimekumbuka
Mwenzenu naja Kilunga, Nyachilo nataka fika.
6.
Luhangazi niwaombe, mwaka huu sitafika,
Nakichelea kimbembe, cha mlima na vichaka,
Nawataka msigombe, ipo siku nitafika,
Mwenzenu naja Kilunga, Nyachilo nataka fika.
7.
Rubwe aishi Kagombe, kwa uhuni asifika,
Hawezi kushika jembe, na vitamu avitaka,
Sasa kizungu aimbe, utakufa kwa kucheka,
Mwenzenu naja Kilunga, Nyachilo nataka fika.
8.
Karibu nafika ambe, mtambue nimechoka,
Nataka nikute embe, na ndizi za kuvundika,
Na mihogo mkachimbe, arafa nilo andika,
Mwenzenu naja Kilunga, Nyachilo nataka fika.

Dotto Rangimoto Chamchua(Njano5.)
Mzalendo.njano5@gmail.com
0784845394/0762845394
Morogoro Tanzania

MAMA, TAMBIKO LIMESHAPITA.

MAMA, TAMBIKO LIMESHAPITA.
1.
Hapa azaliwa mama, na bibi alomzaa,
Si mnaiona milima, kuipanda si mzaa,
Hata waliponituma, kupanda nilikataa,
Mizimu sasa ilale, tambiko limeshapita.
2.
Nimekuja himahima, na moyo ukinipaa,
Metoka Dar salama, na viatu sijavaa,
Nikapanda na mlima, yaani kama kichaa,
Mizimu sasa ilale, tambiko limeshapita.
3.
Sikiza eeh mama, mwanao niko na baa,
Mambo yaenda mrama, niendapo hujikwaa,
Sipati pesa ya sima, kodi yanipa fazaa,
Mizimu sasa ilale, tambiko limeshapita.
4.
Nina pombe ya mtama, mbuzi yu ndani ya chaa,
Nina mkuki na ngoma, na kaniki nimevaa,
Tambiko liende vema, hata nipate shufaa,
Mizimu sasa ilale, tambiko limeshapita.
5.
Mkembe pokea mama, na mwidu niloandaa,
Togwa na gimbi mlima, ngadu sio chanjagaa,
Nyote malale salama, mnikinge na balaa,
Mizimu sasa ilale, tambiko limeshapita.
6.
Hapa sasa kaditama, narudi kwa mikandaa,
Naenda tarudi mama, kutembea sitakaa,
Malengo nipate sima, isokuwa na budaa,
Mizimu sasa ilale, tambiko limeshapita.

Dotto Chamchua Rangimoto. (Njano5)
0762845394/0784845394
mzalendo.njano5@gmail.com

MWANA SIKIZA MGANGA

MWANA SIKIZA MGANGA                              

1.
Umefika kwa mganga,karibu binti wa Vanga,
Hapo usiwe na shanga, uvue na hiyo khanga
kaniki utajifunga, kisha kamata usinga.
Shika neno la mganga, tambiko ling'oe nanga.
2.
Ni jambia sio panga, yajulikana milanga,
Mjohole si mninga, Subiani wampinga?
Jogoo si kifaranga,malohani tayanonga,
Shika neno la mganga,tambiko ling’oe nanga.
3.
Makata ataka ninga,ndege mbeba majanga,
Umeleta njiwamanga, mwana sikiza mganga,
Leo huna la kulonga, tulia silete ngenga,
Shika neno la mganga,tambiko ling’oe nanga.
4.
Usiogope manyanga,ndio mwanzo wa kupunga,
Sijafundishwa kukenga, wala tiba kubananga,
Mwana sicheke uganga, kutabana si ujinga,
Shika neno la mganga,tambiko ling’oe nanga
5.
Natambulika Kiunga,Wasini na huko Vanga,
Kigoma na Sumbawanga,Monduli na Mkuranga,
huko kote nimetinga, hakuna wa kunipinga,
Shika neno la mganga,tambiko ling’oe nanga.

Dotto Rangimoto Chamchua(Njano5)
0784845394/0762845394
mzalendo.njano5
Morogoro Tanzania

YU WAPI RAIS KIKWETE? NAMTAKA HAPA. 50

YU WAPI RAIS KIKWETE? NAMTAKA HAPA. 50
1.
Makabwela na wakwasi, tuchunge tulipotoka,
Mi naona utwesi, nachelea kuanguka,
Hashituki kwa unyasi, aso gongwa na nyoka,
Yu wapi Rais Kikwete, zi wapi ahadi zake.
2.
Siku zimeenda kasi, miezi sasa miaka,
Japo si kazi rahisi, yapo yalo kamilika,
Tumeona ufanisi, udhaifu kadhalika,
Yu wapi Rais Kikwete, zi wapi ahadi zake.
3.
Tuhoji bila tetesi, tushike yenye hakika,
Tusitukane matusi, tuepuke kuboboka,
Tufanye na udadisi, kama twataka kufika,
Yu wapi Rais Kikwete, zi wapi ahadi zake.
4.
Tuanze kuhoji kasi, na nguvu ilo sifika,
Hari kupita kiasi, wallahi alipambika,
Mliuona wepesi, ama shida na mashaka?
Yu wapi Rais Kikwete, zi wapi ahadi zake.
5.
Nauliza hiyo kasi, kwayo tulifaidika?
Ama ndio wasiwasi, kwa watu wa kila rika?
Ziwapi zile nafasi, za watu kuajirika?
Yu wapi Rais Kikwete, zi wapi ahadi zake.
6.
Nguvu mpya na halisi, kweli ilihitajika,
Haya shime tudadisi, kama ndo ilotumika,
Maisha yana akisi, nguvu iliyotumika,.
Yu wapi Rais Kikwete, zi wapi ahadi zake
7.
Hari mpya wasiwasi, hili limethibitika,
Nimeiona nakisi, ya mambo yalotendeka,
Si walimu si manesi, wote wanahangaika,
Yu wapi Rais Kikwete, zi wapi ahadi zake
8.
Unadhifu wa ukosi, kwakweli wanipa shaka,
Akiondoshe kinyesi, bila hata kuchafuka,
Mie naona utasi, kwa jamali msifika,
Yu wapi Rais Kikwete, zi wapi ahadi zake
9.
Tulitaka mwendo kasi, ili tufike haraka,
Tena tupate wepesi, tufike bila kuchoka,
Kumbe tuna mkakasi, firigisi yenye taka,
Yu wapi Rais Kikwete, zi wapi ahadi zake.
10.
Elfu mbili na kumi, aliupata ushindi,
Kwa ahadi kumikumi, si kwa pishi za mahindi,
Ilani ikawa ngumi, kiasi awe mshindi,
Yu wapi Rais Kikwete, zi wapi ahadi zake.
11.
Kuna ahadi ya reli, Dar kanda ya ziwa,
Zipo ahadi za meli, katika yetu maziwa,
Na wajasiriamali, benki kuanzishiwa,
Yu wapi Rais Kikwete, zi wapi ahadi zake.
12.
Mwenzenu sioni reli, werevu wameelewa,
Naona ubahaluli, ufisidi mabehewa,
Huenda ndio reli, ile tulo ahidiwa,
Yu wapi Rais Kikwete, zi wapi ahadi zake.
13.
Zile shauku za meli, katika yetu maziwa,
Tuongee ukweli, iwapi hata ngalawa?
Na wajasiriamali, benki yao wamepewa?
Yu wapi Rais Kikwete, zi wapi ahadi zake.
14.
Ahadi za sipitali, hadhi kupandishiwa,
Naomba tuwe wakweli, hili limefanikiwa,
Tatizo lazikabili, upungufu wa madawa,
Yu wapi Rais Kikwete, zi wapi ahadi zake.
15.
Umeme kila mahali, kaya nyingi kufikiwa,
REA yafanya kweli, kiasi twafanikiwa,
Vijiji mbalimbali, umeme vimewekewa,
Yu wapi Rais Kikwete, zi wapi ahadi zake.
16.
Lindi mkumbuke hili, gridi kuunganishiwa,
Kwa Kigoma imefeli, gridi kuu kupewa,
Ruvuma nawakejeli, naona mmefikiwa,
Yu wapi Rais Kikwete, zi wapi ahadi zake.
17.
Rukwa dhohofu l’hali, gridi ahadi hewa,
Kagera hawana hali, gridi yasubiriwa,
Tumefanywa majahili, wanyonge tumeonewa,
Yu wapi Rais Kikwete, zi wapi ahadi zake.
18.
Wakulima kila mahali, pembejeo watapewa,
Mrijo kuna kiwili, trekta washanunuliwa?
Jembe la mkono dhuli, na bado linatumiwa.
Yu wapi Rais Kikwete, zi wapi ahadi zake.
19.
Kiongozi bulibuli, hakika hutegemewa,
Ati Jakaya fidhuli, asojua kuelewa,
Kikwete katika hili, wallahi anaonewa,
Yu wapi Rais Kikwete, zi wapi ahadi zake.
20.
Barabara zenye lami, na ujengaji wa stendi,
Kwazo tukuze uchumi, sinambie hampendi,
Sasa ni miaka kumi, mambo yetu hayaendi,
Yu wapi Rais Kikwete, zi wapi ahadi zake.
21.
Tanga sifanye harara, naomba nichagueni,
Viwanda na barabara, nitawapa tambueni,
Mtafanya biashara, naomba mniamini,
Yu wapi Rais Kikwete, zi wapi ahadi zake.
22.
Watanga wana hasira, viwanda hawavioni,
Wamepata barabara, Horohoro Ngamiani,
Vijana wana zurura, wana vyeti mkononi,
Yu wapi Rais Kikwete, zi wapi ahadi zake
23.
Mnisikize Kagera, oktoba nichagueni,
Leo nawapa bishara, masikio yategeni,
Tajenga kiwanja bora, ndege zipae angani,
Yu wapi Rais Kikwete, zi wapi ahadi zake
24.
Wamezinduka Kagera, kutoka usingizini,
Nawaona wamefura, kiwanja hawakioni,
Ati wafanye subira, ngumu haiwezekani,
Yu wapi Rais Kikwete, zi wapi ahadi zake
25.
WanaMisenyi Kagera, sijui wampe nini,
Hawaioni mikwara, ya kutolewa ranchini,
Imekuwa manusura, wafukuzwe si utani,
Yu wapi Rais Kikwete, zi wapi ahadi zake.
26.
Bado ningali Kagera, hasa kule mpakani,
Hakuna japo ishara, ya umeme wenzanguni,
Mtukula wana hasira, Uganda si Marekani,
Yu wapi Rais Kikwete, zi wapi ahadi zake.
27.
Mkoa wetu wa Mtwara, na Lindi nisikieni,
Viwanda na barabara, sasa tawajengeeni,
Tena sifanye harara, gesi itawafaeni,
Yu wapi Rais Kikwete, zi wapi ahadi zake.
28.
Wakati wenu Mtwara, kutoka usingizini,
Zile siku za ujura, zimefika ukingoni,
Shime mkapige kura, mchague kwa makini,
Yu wapi Rais Kikwete, zi wapi ahadi zake.
29.
Msidaganywe na gwara, mzingatie ilani,
Msikubali kangara, na fedha za mwafulani,
Mtaipata hasara, nawambia si utani,
Yu wapi Rais Kikwete, zi wapi ahadi zake.
30.
Naomba mnipe mimi, sote tupate ushindi,
Mjue sina umimi, ubinafsi siupendi,
Mie ni mtu wa nyemi, na sina makurubundi,
Yu wapi Rais Kikwete, zi wapi ahadi zake.
31.
Kuulinda usalama, wa Ziwa Victoria,
Nyasa liwe salama, na Tanganyika pia,
Sasa ni lala salama, ahadi zimetimia?
Yu wapi Rais Kikwete, zi wapi ahadi zake.
32.
Ndugu zangu wa Kigoma, vema mkanisikia,
Ondoa shaka Kigoma, Dubai tawapatia,
Nitawatendea mema, mji wenu tavutia,
Yu wapi Rais Kikwete, zi wapi ahadi zake.
33.
Muda ndo wayoyoma, Kigoma inajutia,
Malagarasi ndo jema, kwalo wanafurahia,
Sasa wasaka neema, iliyopotea njia,
Yu wapi Rais Kikwete, zi wapi ahadi zake.
34.
Longido na nchi nzima, maji nitawapatia,
Maji ni kitu lazima, hivyo sitapuuzia,
Mie naona nakama, maji yametufikia?
Yu wapi Rais Kikwete, zi wapi ahadi zake.
35.
Ardhi yazua hasama, ya mitutu na jambia,
Chagueni changu chama, tupate shughulikia,
Naapa nitajituma, hata liwe historia,
Yu wapi Rais Kikwete, zi wapi ahadi zake.
36.
Mie naona nakama, nchi yaangamia,
Wana tabu wakulima, na wafugaji pia,
Unazidi uhasama, msidhani natania,
Yu wapi Rais Kikwete, zi wapi ahadi zake.
37.
Tatizo halijakoma, halijawa historia,
Ya Kilosa na Dodoma, wote tumeyasikia,
Yaani kama wanyama, watumiavyo jambia,
Yu wapi Rais Kikwete, zi wapi ahadi zake.
38.
SHIRECU sishike tama, muache kulialia,
Hayo madeni ya chama, mie nitawalipia,
Nawauliza wanachama, madeni kawalipia?
Yu wapi Rais Kikwete, zi wapi ahadi zake.
39.
Pangani haitazama, ahadi nawapatia,
Hatari taitazama, tena tafuatilia,
Bahari ifanye hima, kisiwa kitabakia,
Yu wapi Rais Kikwete, zi wapi ahadi zake.
40.
Mkulima wa pale Wami, na mvuvi wa Malindi,
Hali zao sizisemi, sio wao hata mafundi,
Kaupandisha uchumi, mambo yao hayaendi,
Yu wapi Rais Kikwete, zi wapi ahadi zake.
41.
Geita kuwa mkoa, ahadi kaitimiza,
Lipo linalo sonoa, huenda likatatiza,
Kuongeza Mikoa, na gharama huongeza,
Yu wapi Rais Kikwete, zi wapi ahadi zake.
42.
Lililomtia doa, operesheni tokomeza,
Nyumba wakazibomoa, mazao wakaunguza,
Tembo mnawaokoa, watu mwawaangamiza,
Yu wapi Rais Kikwete, zi wapi ahadi zake.
43.
Meli tunaitoboa, kwa michezo tunocheza,
Utulivu una doa, amani twaipoteza,
Mjue twajikomoa, dira tukiipoteza,
Yu wapi Rais Kikwete, zi wapi ahadi zake.
44.
Leo Njano na dondoa, sidhani nimeongeza,
Ahadi alizotoa, si zote katekeleza,
Sihitaji chokonoa, zipo alizotimiza,
Yu wapi Rais Kikwete, zi wapi ahadi zake.
45.
Hachukii yuko poa, ajua kubembeleza,
Hata wakimzodoa, ni mzito kudakiza,
Akipakwa mnokoa, ubani ajifukiza,
Yu wapi Rais Kikwete, zi wapi ahadi zake.
46.
Kinamama taokoa, pia tawaendeleza,
Bajaji kila Mkoa, wilayani kusambaza,
Wazae wakiwa poa, vifo tutavipunguza,
Yu wapi Rais Kikwete, zi wapi ahadi zake.
47.
Siseme namboboa, mwenzenu anishangaza,
Swali nataka litoa, hivi nini aliwaza?
Nyachiro sio Kondoa, bajaji hizi zaweza?
Yu wapi Rais Kikwete, zi wapi ahadi zake.
48.
Shida hajaiondoa, maa mwanga maa giza,
Macho tunayakodoa, stima inavyotatiza,
Mfano uanze nyoa, uache hujamaliza.
Yu wapi Rais Kikwete, zi wapi ahadi zake.
49.
Mengi nimedondoa, naendea kumaliza,
Ka’ lipo nilopotoa, mfano kwa kuongeza,
Siache kunikosoa, kwa lile nilopunguza,
Yu wapi Rais Kikwete, zi wapi ahadi zake.
50.
Sasa nakata ulimi, kusema sana sipendi,
Naenda okoa ami, mezama katika lindi,
Ifike mwezi wa kumi, haki ipate ushindi,
Yu wapi Rais Kikwete, zi wapi ahadi zake.

Dotto Chamchua Rangimoto (Njano5)
255762845394/255784845394
mzalendo.njano5@gmail.com
Morogoro Tanzania.