Askari polisi wa Jamhuri ya Kidemokrasia ya Kongo jana walitumia mabomu ya kutoa machozi kuwatawanya maelfu ya wafuasi wa kiongozi mkuu wa upinzani Moise Katumbi ambaye anahojiwa na polisi kwa tuhuma za kukodi mamluki wa kigeni.
Katumbi ambaye ametangaza nia ya kugombea urais katika uchaguzi uliopangwa kufanyika mwezi Novemba anapewa nafasi kubwa ya kumrithi Rais Joseph Kabila ambaye anapaswa kuondoka madarakani baada ya uchaguzi huo. Wafuasi wa kiongozi huyo wa upinzani wanasema tuhuma zilizotolewa dhidi yake ambazo zinaweza kusababisha ahukumiwe kifungo jela zimezushwa kwa lengo la kuvuruga kampeni yake ya kuwania urais.
Serikali ya DRC imesema ina ushahidi kuwa Moise Katumbi alihusika katika kusajili mamluki wa kigeni wakiwemo askari kadhaa wastaafu wa Kimarekani kwa lengo la kutekeleza njama dhidi ya Jamhuri.
Kwa mujibu wa mashuhuda, polisi jana iliwatia nguvuni watu wasiopungua 10 nje ya ofisi ya Mkuu wa Mashtaka katika mji wa pili kwa ukubwa wa nchi hiyo wa Lubumbashi waliokuwa wanaelekea kwenye ofisi hiyo ambako Katumbi aliwasili wakati wa saa tano mchana ili kusailiwa kwa siku ya pili.
Moise Katumbi alikuwa Gavana wa jimbo la Katanga lililoko kusini mashariki mwa Kongo DR kuanzia mwaka 2007 hadi Septemba mwaka jana alipojitoa katika chama tawala cha Rais Kabila cha PPRD akikituhumu kuwa kinapanga njama ya kuendelea kumweka kiongozi huyo madarakani.
