Mahakama ya Juu katika Jamhuri ya Kidemokrasia ya Kongo imesema kuwa huenda Rais Joseph Kabila wa nchi hiyo akasalia madarakani hata baada ya kumalizika muhula wake iwapo uchaguzi mkuu utakosa kufanyika mwezi Novemba mwaka huu.
Katika uamuzi wake jana Jumatano, mahakama hiyo ilisema katiba hairuhusu kuwepo ombwe la uongozi nchini na kwa msingi huo, iwapo uchaguzi wa rais unaotazamiwa kufanyika mwezi Novemba mwaka huu utakosa kufanyika kutokana na sababu yoyote ile, basi Rais Kabila hatakuwa na budi ila kuendelea kuwa uongozini hadi mgogoro huo upatiwe ufumbuzi.
Kabila anapaswa kuondoka madarakani Novemba 19 mwaka huu baada ya kumalizika duru ya pili ya urais.
Kwa miezi kadhaa sasa, jamii ya kimataifa imekuwa ikisisitizia umuhimu wa kufanyika uchaguzi mkuu katika tarehe iliyopangwa huko Kongo DR, huku waungaji mkono wa Rais Joseph Kabila wakitaka zoezi hilo lisogezwe mbele wakisisitiza kuwa mazingira ya sasa hayaruhusu kufanyika uchaguzi. Kwa mujibu wa katiba ya nchi hiyo, Rais Joseph Kabila haruhusiwi kugombea tena katika uchaguzi ujao. Machi 31 mwaka huu, Baraza la Usalama la Umoja wa Mataifa lilipasisha azimio nambari 2277 kuhusu Jamhuri ya Kidemokrasia ya Kongo. Kupitia azimio hilo, Baraza la Usalama lilimtaka Rais Joseph Kabila kuhakikisha kuwa uchaguzi wa rais unafanyika katika muda uliopangwa.
