Wanajeshi wa Tanzania walioko katika kikosi cha Umoja wa Mataifa huko Jamhuri ya Kidemokrasia ya Kongo wanakabiliwa na tuhuma za kuhusika na ubakaji na udhalilishaji wa kijinsia.
Msemaji wa Umoja wa Mataifa Stephane Dujarric amewaambia waandishi habari kuwa tayari kuna kesi 11 za madai ya ubakaji yaliyowasilishwa dhidi ya askari wa Tanzania walioko DRC na hata wale ambao waliwahi kuhudumu nchini humo. Ameongeza kuwa kamanda wa batalioni ya Tanzania amewaweka kizuizini wanajeshi wanaokabiliwa na tuhuma hizo huku uchunguzi ukiendelea.
Umoja wa Mataifa haujataja majina wa askari wanaotuhumiwa lakini imebainika kuwa wote wako au waliwahi kuwa katika kikosi cha umoja huo nchini DRC. Askari wa Tanzania DRC wanakabiliwa na tuhuma za kuhusika katika vitendo vya ngono na watoto na pia kutoa vishawishi kadhaa ili kupata ngono. Dujarric amesema kuna kesi nne za wanajeshi wa sasa kushikisha mimba na kesi zilizosalia ni za askari Watanzania waliowahi kuhudumu DRC.
Vitendo hivyo vyote vimeripotiwa katika kijiji cha Mavivi mashariki mwa DRC karibu na Beni. Umoja wa Mataifa unachunguza vitendo hivyo vya ubakaji na udhalilishaji kijinsia. Wakuu wa Tanzania wamefahamishwa kuhusu kashfa hiyo lakini hawajaeleza iwapo watatuma wachunguzi wao DRC au la. Askari wa Umoja wa Mataifa kote duniani wamekumbwa na kashfa za ubakaji na ngono, na mwaka 2015 kulikuwa na kesi 69 zilizoripotiwa.
