Kaimu Kiongozi wa Harakati ya Ikhwanul Muslimin ya Misri amesema kuwa harakati hiyo itaendelea kufanya maandamano na kuwasilisha malalamiko yake kwa njia ya amani.
Mahmoud Izzat ambaye amechukua nafasi ya Mohammed Badie kiongozi wa Harakati ya Ikhwanul Muslimin jana Jumapili alitoa taarifa na kubainisha kuwa Ikhwanul Muslimin itaendeleza mapambano yake na kuwasilisha malalamiko yake kwa njia ya amani hadi pale itakapofanikisha matakwa yake.
Mahmoud Izzat amesema kuwa Harakati ya Ikhwanul Muslimin itaendeleza mapambano hadi pale uhuru na izza vitakaporejea huko Misri humo, kwa kufuata misingi ya mwasisi wa kundi hilo Hassan al Bana.
Ni zaidi ya miaka miwili sasa ambapo Mohammed Badie Kiongozi wa Harakati ya Ikhwanul Muslimi anashikiliwa korokoroni akituhumiwa kwa makosa mbalimbali na hadi kufiikia sasa amekatiwa hukumu mbili, moja ikiwa ni ya kunyongwa na nyingine ya kifungo cha maisha jela. Rais wa sasa wa Misri Abdel Fattah al Sisi amekuwa akitekeleza siasa za kuwakandamiza wapinzani nchini humo tangu aingie madarakani baada ya rais halali wa nchi hiyo aliyechaguliwa kwa njia ya kidemokrasia Muhammad Morsi kupinduliwa na jeshi mwaka 2013. Maelfu ya wapinzani na wanachama wa ngazi za juu wa Ikhwanul Muslimi wametiwa mbaroni huko Misri na mamia ya wengine kuuliwa.
