NAMPENDA MMOJA, NAYE ANAJUA.

NAMPENDA MMOJA, NAYE ANAJUA.

Kiumbe silete hoja, sikiza nakuambia,
Nimpendaye mmoja, moyoni alonitia,
Hao unao wataja, si wangu wanizushia.
Jina sitakutajia, nimpendaye mmoja.

Apendeza bila koja, wallahi ametimia,
Si usoni hata paja, kila kitu avutia
Nikimuita yuaja, mtiifu wa tabia,
Jina sitakutajia, nimpendaye mmoja.

Hili jambo lina tija, mimi nilo kusudia,
Nimeshatoa mkaja, mahari yafuatia,
Nimeuchoka useja, wa mito kukumbatia,
Jina sitakutajia, nimpendaye mmoja.

Muogope sana mja, mama aliniusia
Haishiwi na harija, mapenzi kukuvunjia
Hatimaye huwa chaja, muhibu awe nokia,
Jina sitakutajia, nimpendaye mmoja.

Kwahivyo sioni haja, ya jina kukutajia,
Kutotaja sikuroja, ni mafunzo ya nabia,
Naomba sikose kuja, hiyo siku kiwadia,
Jina sitakutajia, nimpendaye mmoja.

Ukome kutajataja, njia ni'zo zipitia,
Hayo unayo bwabwaja, yasije kumfikia,
Tungule iwe tunguja, iso faa kupikia,
Jina sitakutajia, nimpendaye mmoja.

Naapa sitakufuja, ulipo nyonda sikia,
Mahaba hayatachuja, kama safi zetu nia,
Lije vumba la kangaja, jua nitavumilia,
Jina sitakutajia, nimpendaye mmoja.

Dotto Rangimoto Chamchua(Njano5)
0622845394
Morogoro.

ZITTO NA MAMBO KUMI YALO MSHINDA MAGUFULI

Siku 100 za Utawala wa Awamu ya 5 chini ya Rais Magufuli
Mambo 10 ya Msingi ambayo Rais Magufuli ameshindwa kuyafanya tangu aingie madarakani.

1 Mikataba yote ya Rasilimali za Nchi - PSAs Kwa Mafuta na Gesi Asilia na MDAs Kwa Madini bado ni Siri na sio Rais au Makamu wa Rais au Waziri Mkuu ambaye kaonyesha hata nia ya kutazama upya mikataba hii na kuiboresha Kwa maslahi ya watanzania. Mapato ya Nchi, makubwa kuliko ya utumbuaji majipu, yanaendelea kupotea. Mkataba wa IPTL bado unaendelea kunyonya Nchi na Serikali inatazama tshs 8 bilioni zinalipwa Kwa matapeli wa IPTL na PAP kila mwezi. Katika siku 100 tangu Rais Magufuli aingie madarakani, jumla ya tshs 30 bilioni zimeshalipwa Kwa IPTL/PAP ambazo zingeweza kununua CT scan Kwa hospitali zote za mikoa nchini. Fedha hii ni zaidi ya mkopo ambao Serikali imechukua kutoka Benki ya Dunia ili kujenga ' fly over ' ya Ubungo jijini Dar Es Salaam.

2) Posho za makalio katika mfumo mzima wa Serikali bado zinalipwa bila kufutwa kama Mpango wa Maendeleo 2011/2012 - 2015/2016 unavyotaka na kuagiza. Serikali imeongeza posho za kujikimu mpaka tshs 120,000 Kwa siku na Kwa wabunge bado wanalipwa posho ya makalio ya tshs 220,000 Kwa siku. Posho ambazo zimeshalipwa tangu Rais aingie madarakani ni sawa na kujenga barabara zote viporo za lami kuunganisha mkoa wa Tabora ( Kaliua - Urambo na Nyahua - Itigi ).

3) Serikali bado inatumia mashangingi na kila Waziri, Katibu Mkuu na wakuu wa idara wanatumia mashangingi ya gharama kubwa.

4) Tanzania bado inaagiza Sukari kutoka Nje na Serikali haina Mpango wowote ule wa kuondoa tatizo hilo. Hata katika Mpango wa Maendeleo Serikali haisemei sukari kabisa. Uagizaji wa Sukari ni jipu ambalo limeiva Lakini mkamuaji analilea. Hivyo hivyo Kwa sekta ya Nguo bado viwanda vya ndani vinapata ushindani usio halali kutoka Kwa nguo kutoka Nje zenye kuingia nchini bila kodi.

5 Taarifa ya Serikali kuhusu utoroshaji wa fedha Nje bado imefichwa na haijafikishwa bungeni. Hakuna hatua zozote zilizochukuliwa kudhibiti utoroshaji fedha na hakuna mashtaka yaliyofunguliwa Kwa wahusika.

7 TAKUKURU bado haina mamlaka ya kukamata na kushtaki wenye makosa ya kifisadi. Vile vile mfumo wa kila mwenye Mali athibitishe yeye kaipataje ( reverse burden of proof ) haujaanzishwa nchini na matokeo yake ni kuzorota Kwa juhudi za kumaliza ufisadi Kwa kuboresha mifumo. Kinachoendelea ni kutumbua majipu kimkakati bila kuzuia majipu kuota tena.

8 Mali na Madeni ya Viongozi bado ni Siri. Wananchi hawajui Rais Wao anamiliki nini AMA anadaiwa nini. Hivyo hivyo Kwa viongozi waandamizi wote. Serikali ya Awamu ya Tano imeendeleza mfumo ule ule wa maadili ulio dhaifu na wenye kulea vitendo vya rushwa.

9 Serikali ya Jamhuri ya muungano wa Tanzania imeshindwa kabisa kushughulikia suala la Zanzibar na matokeo yake ni kuiweka Nchi kwenye hatari kubwa ya kuvunjika Amani. Mshindi wa Uchaguzi Zanzibar hajatangazwa na Rais ametishia wananchi kuwa atatumia majeshi kukandamiza madai halali ya wananchi wa Zanzibar.

10 Hakuna hatua zozote zimechukuliwa kuanza mchakato wa Katiba. Inaonyesha Serikali haina mpango kabisa na Katiba mpya.

IJUE SARATANI(CANCER)

IJUE SARATANI(CANCER)

Saratani ni mkusanyiko wa magonjwa yanayo husiana ambayo huanza mara baada ya seli za mwili kuongezeka na kugawanyika kupita mahitaji ya mwili.
Kwa aina zote za kansa, hutokea pale baadhi ya seli za mwili kuanza kugawanyika bila kukoma na kusambaa katika tishu zingine kutoka pale zilipo anzia!

Saratani ikoje?

Awali ya yote vema mjue kuwa mwili wa mwanadamu una seli zaidi tirioni 37, na zote hizo zina kazi maalum, huchoka, huaribika, na hatimaye hufa! Seli zinapokufa zingine huzalishwa ili kuchukua nafasi ya seli zilizo kufa. Kwa hivyo ili mifumo ya mwili ifanye kazi zake vizuri ni lazima seli zilizochakaa na kuharibika zife.

Saratani huweza kuanza sehemu yoyote ya mwili wa mwanadamu. Saratani inapozuka ule mchakato wa kawaida unaotawala na kuratibu seli huacha kufanya kazi kama inavyotakiwa.
Matokeo ya mchakato kufeli, hupelekea seli kuwa si za kawaida(more and more abnormal). Seli zilizo zeeka, kuchakaa na zilizoharibika huendelea kuishi badala ya kufa kama ilivyo kawaida, na kubwa zaidi seli mpya kuzalishwa kwa wingi sana kuzidi mahitaji ya mwili.
Seli mpya hugawanyika kwa kasi na kwa wingi bila kukoma, na matokeo yake hufanya uvimbe(tumors)

Saratani nyingi hufanya uvimbe ambao ukiugusa huwa mgumu, si wenye kubonyea. Uvimbe huu huwa ni mkusanyiko wa tishu uliotokana na seli za saratani. Saratani ya damu kama vile leukemias huwa haifanyi uvimbe.

Kuna aina mbili za uvimbe wa saratani.
Kuna uvimbe wa saratani unaoitwa malignant: Uvimbe wa namna hii una uwezo kusambaa katika mwili mathalani kwa kupitia mfumo wa damu.

Kuna uvimbe unaoitwa benign ambao wenyewe seli zake hazisambai na kushambulia tishu zingine toka pale ulipozukia, uvimbe huu unaweza kuwa mkubwa lakini ukitolewa kwa upasuaji mara nyingi haurudi tena! uvimbe wa benign huweza kutokea sehemu yoyote ya mwili lakini isiwe tatizo isipokuwa tu kama ukitokea kwenye ubongo maisha ya mgonjwa huwa hatarini.
Kuna tafauti gani kati ya seli za saratani na seli za kawaida? Saratani huzuka vipi? Kuna uhusiano gani kati ya vinasaba na seli za saratani? Dalili za saratani ndio zipi? Matibabu ya saratani yakoje? Tunajikingaje na saratani?

Leo naomba niishie hapa, nikipata nafasi inshallah nitaendelea huku nikiongozwa na maswali hayo.
Nimeandika makala haya kwa msaada wa tovuti ya National Cancer Institute ya Marekani na tovuti ya American Cancer Society.
Dotto Rangimoto Chamchua (Njano5)
Admin
0622845394

TANZANIA NAKUPENDA SANA.

TANZANIA NAKUPENDA SANA.
Mama Tanzania, nakupenda sana,
Nakupigania, usiku mtana,
Zitaangamia, husuda fitina,
Za walo pania, watu kuchinjana
Nakupenda sana, wangu Tanzania.

Siwati kulia, tunapo zozana,
Huomba Jalia, tupate patana,
Tusiwape ndia, wafanya hiyana,
Wapate kimbia, wasirudi tena.
Nakupenda sana, wangu Tanzania.

Siasa ni njia, ya kuongozana,
Katu si jambia, roho kutoana,
Yataka sikia, kushauriana,
Mambo hutimia, kwa kusikizana.
Nakupenda sana, wangu Tanzania.

Ninajivunia, kuwa wako mwana,
Katika Dunia, hata kwa Rabana,
Mi husimulia, Ulaya na China,
Mola kajalia, vitu vingi sana.
Nakupenda sana, wangu Tanzania.

Dotto Rangimoto Chamchua (Njano5)
0622845394/0784845394 Morogoro.

MAMBO USO YAJUA KUHUSU NYOTA JUA NA MWISHO WA SAYARI DUNIA.

MAMBO USO YAJUA KUHUSU NYOTA JUA NA MWISHO WA SAYARI DUNIA.


Jua ndio kitu pekee ambacho kiko katikati ya mfumo wa jua. Jua ni 99.86% ya uzito(mass) wa mfumo wa jua.
Kimsingi jua ni mkusanyiko wa hydrogen na helium, 74.49% hydrogen na 23.8% helium.
Joto la kitovu cha jua linakadiriwa kufikia nyuzi joto milioni 15, wakati tabaka la nje lina nyuzi joto 5500.

Jua huchukua mwezi mmoja kumaliza mzunguko wake katika mhimili wake, na hii inakadiriwa tu na sababu kubwa umbo la jua ni kama mpira wa plasma. Kutokana na umbile lake, mzunguko hutofatiana tabaka na tabaka.
Mathalani, sehemu ya tabaka la nje karibu na ikweta yake, humaliza mzunguko wake kwa siku 25.4 wakati karibu na "poles" huchukua siku 36. Imethibitika tabaka la ndani la jua huzunguka sana kuzidi tabaka la nje.

Wastani wa umbali kati ya jua na dunia ni km milioni 150 na mwanga husafiri kwa spidi ya km 300,000 kwa sekunde, teh, ukiwa mwanahisabati kama mimi na ukikokotoa utagundua mwanga wa jua hutumia dakika 8 kisafiri kutoka katika jua na kutufikia duniani.

Cha kufurahisha hapa, hii nishati hutumia dakika nane kutufikia duniani, lakini pia hutumia mamilioni ya miaka kusafiri kutoka katika kitovu cha jua na kufika katika tabaka la nje la jua(ambapo kutoka hapo ndio hutumia dakika 8 kufika duniani)

Hii ina maanisha nini? ina maanisha mwanga wa jua unao uona sasa si wasasa bali ulianza safari yake hadi kukufukia hapo ulipo mamilioni ya miaka.
Katikati ya kitovu cha jua asilimia kubwa ya nishati ya jua huzalishwa kutokana na mlipuko wa kinyuklia ambao huvunja hydrogen (converts into) kuwa helium. 99% ya nishati ya joto(thermal energy) inayotengenezwa na jua hutokea katika kitovu chake.

Wanasayansi wanasema kuwa jua iliundwa(formed) miaka bilioni 4.57 iliyopita kutokana kupasuka na kusambaratika kwa "giant molecular cloud" lilosheheni kwa wingi hydrogen na helium. Mpasuko huo ndio ukazaa nyota nyingi ikiwemo na nyota jua

Ikiwa sasa na umri wa miaka bilioni 4.5 jua iko nusu ya umri wake kama vile mtanzania akiwa na miaka 30 yuko nusu ya umri wake. Dunia imeshachoma nusu ya akiba yake ya hydrogen na kiasi kilichobaki kinakadiriwa kumalizika miaka bilioni 5 ijayo.

Kwakuwa nyota jua iko katika jamii ya nyota zinazojulikana Yellow Dwarf, hivyo kuisha kwa hydrogen hakutasababisha kutokea kwa supernova(mlipuko mkubwa wa nyota), bali jua litabadilika na kuwa jekundu na kubwa zaidi kiasi cha kumeza sayari za karibu kama zebaki, zuhuru na dunia.
Kwa vyovyote vile hatutashuhudia kumezwa kwa kudunia, sababu kabla hata ya dunia kumezwa maji yote juu ya uso wa dunia na chini ya ardhi yatakuwa yamepotelea angani kama gesi, dunia haitakuwa na maji tena na joto lake litakuwa kubwa sana kiasi kila kiumbe hai afe. MWISHO WA DUNIA.

Hydrogen ikiisha na helium itaendelea kuchomeka kwa miaka milioni 130, kwa kupindi hicho jua na mfumo wa jua utakuwa umebadilika sana, na hilo likitokea orbiti ya dunia inakuwa si sehemu salama ya dunia.

Mambo yatakayo weza kufanyika ili kuwe na usalama ni kwa orbit hiyo kuahamishwa kabisa kutoka ilipo sasa, na kwakuwa jua litapoteza kabisa nishati yake ya sasa na kama tujuavyo uhai uliopo duniani unategemea sana nishati ya jua, hivyo salama zaidi ni kwa dunia na orbiti yake kuahamishwa kutoka katika mfumo wa jua na kwenda katika nyota nyingine ili mradi tu hiyo nyote iwe katika kundi la nyota za likenia katika galaxy ya milky way.

Inasemekana katika galaxy zote, ni galaxy ya milky way ndio kuna uhai(milky way is only known galaxy dat support life).

Wanaanga bado wanaendelea kuifanyia utafiti anga na ulimwengu kwa ujumla, tafiti zao huenda zitakuwa msingi mzuri kwa vizazi vijavyo kujua namna ya kuihamisha dunia au kugundua nyota nyingine yenye sayari inayoweza kuwa sawa na dunia hata watu wapate kuhamia huko pindi dunia ikifikia mwisho.

Wanasayansi wanakubali uwepo wa mwisho wa dunia na wanakubali kuwa nyota jua ina mwisho wake, lakini hakubali kuwa hayo yanasabishwa na mungu. Hata hivyo, wako busy kuhakikisha dunia haifikii mwisho.
Njano5
784845394/762845394

UKIONACHO NDOTONI.

  

        


UKIONACHO NDOTONI.

Kiona choo ndotoni, kiumbe sikitumie,
Haja iwe mlangoni, kazana ishikilie,
Tena fanya hukioni, shukani siyaachie.
Yataka uzingatie, uyaonayo ndotoni.

Kiona kiza ndotoni, mwenzangu usiumie,
Mfano mwanga uoni, pambana ukufikie,
Swali utoke shimoni, Rabi akuangazie
Yataka uzingatie, uyaonayo ndotoni.

Kiona simba ndotoni, naomba simkimbie,
Mrukie mgongoni, kipando ujifanyie,
Uwatazame usoni, maadui wazimie,
Yataka uzingatie, uyaonayo ndotoni.

Kiona swala ndotoni, kichale umnyatie,
Sije zama mtegoni, kijanja mkaribie
Mtazame pasi soni, asiwe chui ulie,
Yataka uzingatie, uyaonayo ndotoni.

Dotto Rangimoto Chamchua.(Njano5)
mzalendo.njano5@gmail.com
0762845394/0784845394
Morogoro Tanzania

NDUGU ZANGU NAWAJUA, SITAKI KUKUMBUSHWA.

                 NDUGU ZANGU NAWAJUA.

1.     Nimejifunza si haba, natambua ndugu zangu,
Kuna dhahabu na shaba, najua tamu na chungu,
Hasidi nimpe huba, sitathubutu wenzangu,
Sihitaji kukumbushwa, ndugu zangu nawajua.

2.     Nasema ninawajua, kwa marefu na mapana,
Nao pia wanijua, kwa usiku na machana,
Iwe mvua ama jua, wenyewe tunashikana,
Sihitaji kukumbushwa, somo zangu nawajua.

3.     Simung’unyi nawajua, leo niwape yakini,
Muwache kujizuzua, suhuba pake moyoni,
Mkome kujifutua, sifa zitawaueni
Sihitaji kukumbushwa, ndugu zangu nawajua

4.     Mjue vitendo vyenu, vizuri mseme navyo,
Tegeni sikio zenu, msikie msemwavyo,
Naogopa kula chenu, sitaki kusemwa ovyo,
Sihitaji kukumbushwa, ndugu zangu nawajua

5.     Wa kushoto usijue, kuvuli katoa nini,
Hino ibada mjue, kwa mola wetu Manani,
Ushetani mtambue, kutangaza hadharani,
Sihitaji kukumbushwa, ndugu zangu nawajua

6.     Mtoa kitu kwa ria, huvaa vazi la mungu,
Adhabu tamshukia, aja lia kwa uchungu,
Hapa kikomo natia, nafunga kitabu changu,
Sihitaji kukumbushwa, ndugu zangu nawajua

          Dotto Chamchua Rangimoto(Njano5

          Mzalendo.njano5@gmail.com

          0784845394/0762845394

          Morogoro Tanzania

ORODHA YA WALIOKWEPA KULIPA KODI.

Orodha ya waliokwepa kulipa kodi makontena 329 yaliyoikosesha serikali 80b
1. Lotai Steel Tanzania Ltd iliyokuwa na makontena 100,
2. Tuff Tryes Centre Company 58,
3. Binslum Tyres Company Ltd 33,
4. Tifo Global Mart Company Limited 30,
5. Ips Roofing Company Limited 20,
6. Rushywheel Tyre Centre Co Ltd 12,
7. Kiungani Trading Co Ltd 10.
8. Homing International Limited (9),
10. Red East Building Materials Company Ltd (7),
11. Tybat Trading Co Limited (5),
12. Zing Ent Ltd (4),
13. Juma Kassem Abdul (3),
14. Salum Link Tyres (3),
15. Ally Masoud Dama (2),
16. Cla Tokyo Limited (2),
17. Farid Abdullah Salem (2),
18. Salum Continental Co (2),
19. Zuleha Abbas Ali (2)
20. Snow Leopard Building (2).

Wamiliki wengine wa makampuni ambayo yalikuwa na kontenta moja moja ni Abdulaziz Mohamed Ally, Ahmed Saleh Tawred, Ali Amer, Ally Awes Alhamdany, Awadhi Salim Saleh, Fahed Abdallah Said, Hani Said, Hassan Husrin Suleyman, Humud Suleiman Humud, Kamil Hussein Ali na Libas Fashion.
Wengine ni Nassir Salehe Mazrui, Ngiloi Ulomi Enterprises Co Ltd, Omar Hussein Badawy, Said Ahmad Hamdan, Said Ahmed Said, Salumu Peculier Tyres, Sapato N. Kyando, Simbo Yonah Kimaro, Strauss International Co. Ltd na Swaleh Mohamed Swaleh.
Orodha hiyo inafanya jumla ya makontena 329 ambayo yaliondolewa kinyume cha taratibu kutoka ICD ya Azam inayomilikiwa na Said Salim Bakhresa And Company Limited.
Bidhaa zilizokuwemo ndani ya makontena hayo ni pamoja na matairi ya magari, samani mbalimbali, betri za magari, vifaa vya ujenzi, nguo na bidhaa zingine mchanganyiko.

LEO NAVUNJA KIBUBU!

LEO NAVUNJA KIBUBU!
1
Leo navunja kibubu, pesa ninunue khanga,
Apendeze mahabubu, kama binti wa kitanga
Atokapo awe bubu, washindwe wano jigonga
Mniache nayajenga, mkome kunita zoba.
2
Sasa navunja kibubu, nipate nunua kanga,
Ale ashibe muhibu, kitoweo si mchunga,
Usiku tule kababu, uji pilipilimanga,
Mniache nayajenga, mkome kunita zoba.
3
Mimi navunja kibubu, nikagule kungumanga,
Nimpatie tabibu, mafusho toka Umanga,
Nimuenzi taratibu, niseme na zake nyonga
Mniache nayajenga, mkome kunita zoba.
3
Mie navunja kibubu, habibi apate shanga,
Mapambo yake dhahabu, vidoleni na kitanga,
Sawa nipate adhabu, apendeze wangu ninga,
Mniache nayajenga, mkome kunita zoba.
4
Njano navunja kibubu, lengo niweze kujenga,
Nyumba isiwe na tabu, mahaba yatie nanga,
Penzi lataka adabu, siwezi kulibananga,
Mniache nayajenga, mkome kunita zoba

Dotto Rangimoto Chamchua(Njano5)
0784845394/0762845394
mzalendo.njano5
Morogoro Tanzania