IRAN: HATUHITAJI RUHUSA YA MTU KUJIHAMI.

Mshauri wa Kiongozi Muadhamu wa Mapinduzi ya Kiislamu ametoa radiamali kuhusiana na matamshi ya msemaji wa Wizara ya Mashauri ya Kigeni ya Marekani aliyotoa kuhusiana na mpango wa makombora wa Iran na kusema kuwa, taifa hili halihitaji kupata ruhusa ya mtu yeyote kwa ajili ya kujihami.

Ali Akbar Velayati amesema kuwa, baadhi ya wanachama wa kudumu wa Baraza la Usalama la Umoja wa Mataifa kama Russia inaamini kwamba, hatua hii ya Iran ya kufanya majaribio ya makombora haipingani na azimio la Baraza la Usalama.

Msemaji wa Wizara ya Mashauri ya Kigeni ya Marekani alinukuliwa hivi karibuni akisema kuwa, Washington inayachukulia majaribio ya makombora ya balistiki ya Iran kwamba, ni hatua ya kichochezi na yenye lengo la kuvuruga uthabiti.

Iran hivi karibuni ilifanyia majaribio kombora la balistiki lenye uwezo wa kuruka masafa ya kilomita 2,000 na kulenga shabaha kwa ustadi mkubwa.

Nchi za Magharibi hasa Marekani, Uingereza, Ufaransa na Ujerumani zimekuwa zikikosoa majaribio ya makombora ya balisitiki Iran na kudai eti majaribio hayo yanakiuka azimio nambara 2231 la Baraza la Usalama la Umoja wa Mataifa lililopitishwa baada ya mapatano ya nyuklia ya Iran yaliyofikiwa baina ya Iran na madola sita makubwa duniani.

GAMBIA NA SENEGAL ZIKO KATIKA MGOGORO WA MPAKA.

Mgogoro umezuka baina ya Gambia na Senegal, kutokana na kuwania mpaka kati yao.

Habari kutoka nchini Gambia zinaripoti kuwa, hali ya kijamii, kiuchumi na kisiasa imezidi kuzorota nchini humo ikiwa imesalia miezi saba kabla ya kufanyika uchaguzi wa rais kutokana na mgogoro huo wa kimipaka na Senegal.

Mgogoro huo uliibuka kufuatia hatua ya Rais Yahya Jammeh wa Gambia ya kuongeza kiwango cha ushuru kwa ajili ya wafanyabiashara wa magari ya mizigo kutoka Farank CFA elfu nne hadi laki nne. Hata hivyo Rais Jammeh ameituhumu serikali ya Senegal kuwa muhusika mkuu wa mgogoro huo. Inafaa kuashiria kuwa, Rais Yahya Jammeh amekuwa madarakani nchini Gambia kwa kipindi cha miaka 24 sasa.

Wapinzani wa chama tawala cha UDP, ambao wanataka kuachiliwa huru makumi ya wanasiasa wanaoshikiliwa na polisi ya Gambia, wameutaja utawala wa rais huyo kuwa usio wa kisheria. Licha ya juhudi za Umoja wa Afrika na Jumuiya ya Kiuchumi ya Nchi za Magharibi mwa Afrika (ECOWAS) kuzitaka Senegal na Gambia kufanya mazungumzo kwa ajili ya kutatua mgogoro huo, lakini serikali ya Dakar imesema mazungumzo hayo hayawezi kufanyika.

POLIS DRC YATUMIA MABOMU YA MACHOZI KUTAWANYA WAFUASI WA KATUMBI.

Askari polisi wa Jamhuri ya Kidemokrasia ya Kongo jana walitumia mabomu ya kutoa machozi kuwatawanya maelfu ya wafuasi wa kiongozi mkuu wa upinzani Moise Katumbi ambaye anahojiwa na polisi kwa tuhuma za kukodi mamluki wa kigeni.

Katumbi ambaye ametangaza nia ya kugombea urais katika uchaguzi uliopangwa kufanyika mwezi Novemba anapewa nafasi kubwa ya kumrithi Rais Joseph Kabila ambaye anapaswa kuondoka madarakani baada ya uchaguzi huo. Wafuasi wa kiongozi huyo wa upinzani wanasema tuhuma zilizotolewa dhidi yake ambazo zinaweza kusababisha ahukumiwe kifungo jela zimezushwa kwa lengo la kuvuruga kampeni yake ya kuwania urais.

Serikali ya DRC imesema ina ushahidi kuwa Moise Katumbi alihusika katika kusajili mamluki wa kigeni wakiwemo askari kadhaa wastaafu wa Kimarekani kwa lengo la kutekeleza njama dhidi ya Jamhuri.

Kwa mujibu wa mashuhuda, polisi jana iliwatia nguvuni watu wasiopungua 10 nje ya ofisi ya Mkuu wa Mashtaka katika mji wa pili kwa ukubwa wa nchi hiyo wa Lubumbashi waliokuwa wanaelekea kwenye ofisi hiyo ambako Katumbi aliwasili wakati wa saa tano mchana ili kusailiwa kwa siku ya pili.

Moise Katumbi alikuwa Gavana wa jimbo la Katanga lililoko kusini mashariki mwa Kongo DR kuanzia mwaka 2007 hadi Septemba mwaka jana alipojitoa katika chama tawala cha Rais Kabila cha PPRD akikituhumu kuwa kinapanga njama ya kuendelea kumweka kiongozi huyo madarakani.

LONDON YAPATA MEYA WA KWANZA WA KIISLAMU.

LONDON YAPATA MEYA WA KWANZA WA KIISLAMU.

Mwanasiasa wa Chama cha Laba cha Uingereza Sadiq Khan amechaguliwa kama meya wa London, na kuwa meya wa kwanza muisilamu wa mji mkuu huo kulingana na matokeo rasmi yaliyotangazwa mapema leo.

Khan, 45, alishinda mpinzani wake mkubwa, Zac Goldsmith, wa chamaa cha Conservative katika uchaguzi wa meya uliofanyika siku ya Alhamisi na akawa meya wa tatu wa mji huo, baada ya Ken Livingstone na Boris Johnson.

MSUKUMA HABARI YAKO.

MSUKUMA HABARI YAKO.
1
Mpemba sabalheri, unaionaje hali,
Kwangu mie ni buheri, namshukuru Jalali,
Usiwe na munkari, lijibu langu suali,
Kwanini wapenda shari, kama vile hauswali?
Nang'ata na kupuliza, utani nawatania.
2
Mgogo habari yako, salamu zangu pokea,
Hapa nina swali lako, lile ulilo zoea,
Kuomba silika yako? jibu ninalingojea,
Lini unarudi kwako? Dom ulipotokea?
Nang'ata na kupuliza, utani nawatania.
3
Mtumbatu nampenda, wenzangu naweka wazi,
Mtu huyu hana inda, tena hana utalazi,
Mwaminifu kama kunda, akiwa na laazizi,
Sishangae akikonda, sababu ya mkumbazi.
Nang'ata na kupuliza, utani nawatania.
4
Mmakunduchi mpole, si mwepesi kuchukia,
Tena hapendi kelele, na fujo kuzisikia,
Aenda huku na kule, kuti ajitafutia,
Ila mvivu kwa shule, umande aukimbia,
Nang'ata na kupuliza, utani nawatania.
5
Mzaramo sikupati, zinduka silale doro,
Uwate tupu kibeti, isifike yako soro,
Wapenda kichenipati, watoto wakosa karo,
Unalitunza kabati, nguo waweka kwa poro,
Nang'ata na kupuliza, utani nawatania.
6
Msukuma simsemi, ila ukweli nampa,
Sio kwamba hajitumi, tatizo ni zake pupa,
Pombe ageuza maji, huku nguo azitupa,
Akifika kwenye lami, anayavua malapa.
Nang'ata na kupuliza, utani nawatania.
7
Mnyakyusa kwa vioja, hakuna wa kumpata,
Fulusi anazifuja, kama vile aokota,
Aagizia mapaja, jikoni yalo tokota,
Anywa supu kwa mrija,soda kwake tarumbeta,
Nang'ata na kupuliza, utani nawatania.
8
Mhaya apenda sifa, tena kupita kiasi,
Aweza lalia fafa, kibanda chake cha nyasi,
Pia asiwe na sofa, masikini si mkwasi,
Atatamba sio lofa, ana kasri Parisi
Nang'ata na kupuliza, utani nawatania.
9
Mhehe si mchokoze, hasa yule wa Kalenga,
Tena simgombeze, usimfanyie ngenga,
Hujui na nikujuze, mwepesi wa kujinyonga,
Kosa lake mueleze, maneno ukiyachunga.
Nang'ata na kupuliza, utani nawatania.
10
Mkuriya ana nini, leo nataka ukweli,
Kila siku gazetini, mara lile mara hili,
Kumwaga damu mwilini, kwake yeye ni sahali,
Ana tatizo rasini, kiasi aitwe nduli,
Nang'ata na kupuliza, utani nawatania.
11
Mluguru kwa kulima, mwenzenu nampongeza,
Gimbimaji na mlima, kuchemsha anaweza,
Wali wake kama sima, wallahi hutaongeza,
Atasema kwa heshima, mkono umeteleza,
Nang'ata na kupuliza, utani nawatania.
12
Mchaga toka Machame, aongoza ubahili,
Yu tayari akuchome, kikubwa apate dili,
Asemwa ni gumegume, ati ni yake asili,
Kama mate umteme, kiumbe huyu katili,
Nang'ata na kupuliza, utani nawatania.
13
Mha atege sikio, nisemalo asikie,
Anajua kwenda mbio, lengo lake litimie,
Afanye watu fagio, njia wamsafishie
Apate mafanikio, awaacha wajifie.
Nang'ata na kupuliza, utani nawatania.
14
Mkwere ana maneno, huyasema rejareja,
Kwa mithali na mifano, huzichanganya lahaja,
Kesha maliza matano, weye huna hata moja,
Vile bila ndoano, ajipatia kangaja,
Nang'ata na kupuliza, utani nawatania.
15
Mnyamwezi kwa ushamba, nadhani atia fora,
Avae apige pamba, utacheka kama jura,
Akiwa alima shamba, anaruka kama chura,
BASATA wakimbamba, 'taungana na Snura.
Nang'ata na kupuliza, utani nawatania.
16
Mdigo yule wa Tanga, asifika kwa kupika,
Uchungu wote wa chunga, kirahisi inalika,
Kwa mapenzi ndio nanga, ukizama hutatoka,
Ukikutoka ujinga, nguo anaziloweka,
Nang'ata na kupuliza, utani nawatania.
17
Mpare wa milimani, analima tangawizi,
Anashangaza jamani, chai yake ya mluzi,
Haipiki na majani, yaani hata mizizi,
Wanayo fikira gani, mjue sijamaizi,
Nang'ata na kupuliza, utani nawatania.
18
Mfipa kwake Mpanda, Mpimbwe na Sumbawanga,
Kibeku anakipanda, anapaa akiwanga,
Hufanya analopenda, kwa tunguri na usinga,
Akitaka kukuwinda, anakuchinjia ninga.
Nang'ata na kupuliza, utani nawatania.
19
Mmakonde mla panya, ati samaki mchanga,
Leo mimi nakukanya, ndugu yangu wa Nambunga,
Hebu jaribu kufanya, uvue japo mkunga,
Rohoni nimekusinya, natamani kukutenga.
Nang'ata na kupuliza, utani nawatania.
20.
Kaditama samahani, nyie nilio wakwaza,
Mimi ni wenu mtani, sio yule wa Vigwaza,
Natokea undambani, Ifakara si Muheza,
Msiweke mtimani, lengo si kuwachokoza.
Nang'ata na kupuliza, utani nawatania.

Dotto Rangimoto Chamchua(Njano5)
whatspp/call 0622845394 Morogoro.

AZAM IMETINGA NUSU FAINALI KOMBE LA SHIRIKISHO.

Klabu ya Azam FC imetinga fainali ya michuano ya Kombe la Shirikisho nchini Tanzania baada ya kuifunga Mwadui kwa mikwaju ya penati 5 kwa 3.
Azam imefikia hatua hiyo baada ya dakika 120 kumalizika kwa timu hizo kufungana mabao 2-2.

Penati za Azam zimefungwa na Waziri Salum, Allan Wanga, Himid Mao, John Bocco na Agrey Moris huku Kelvin Sabato akikosa penati ya 4 kwa upande wa Mwadui.

KENYA NA TANZANIA ZAKAMATA GARI TATU ZA WIZI.

Polisi wa Kenya na wale wa Tanzania wamepata magari matatu ambayo yalikuwa yameibiwa nchini Kenya na kupelekwa mjini Moshi.Polisi kwenye kaunti ya Taita Taveta wanasema mojawepo wa magari hayo ni ya kampuni ya China inayojenga reli nchini Kenya ya Zong Miang Engineering Company .
Magari hayo matatu yalipatikana yametelekezwa bila mtu kwenye mji huo wa Moshi nchini Tanzania.

USAWA WA BAHARI HUKO NEW ZEALAND UTAINUKA KWA MM 30 KATIKA KARNE HII.

Usawa wa bahari kando ya New Zealand utainuka kwa milimita 30 hata mita moja ndani ya karne hii

Ripoti iliyotolewa na taasisi ya New Zealand inaonesha kuwa, kama utoaji wa hewa inayosababisha kuongezeka kwa joto duniani hakutapungua kwa kiasi kikubwa, joto litaendelea kuongezeka, na usawa wa bahari kando ya New Zealand utainuka kwa milimita 30 hata mita moja ndani ya karne hii.

Kuinuka kwa usawa wa bahari kutasababisha maji ya bahari kuingia kwenye fukwe nchini humo, na hivyo mafuriko yatatokea mara kwa mara wakati wa mvua kubwa. Hivi sasa watu wengi wanaishi pwani, na theluthi mbili ya watu wanaishi katika maeneo yaliyo kwenye hatari zaidi ya kukumbwa na mafuriko.

Mfano pwani ya Otago iliyoko kisiwa cha kusini cha nchi hiyo, tofauti kati ya urefu wa mawimbi yanayosababishwa na tufani yanayotokea kila baada ya miaka miwili na mawimbi makubwa yanayotokea kila miaka mia moja ni milimita 32 tu, hii inamaanisha kuwa kama usawa wa bahari ukiinuka kwa milimita 30, maafa ya mafuriko yaliyotokea kila miaka mia moja huenda yatatokea kila mwaka.

Licha ya hayo, wakati joto linapoendelea kuongezeka, mvua itapungua, kazi za ujenzi, uzalishaji viwandani na utoaji wa maji baridi zitakabiliwa na shinikizo kubwa. Wanyama na mimea ambayo sasa iko hatarini huenda vitatoweka.

Ingawa kuongezeka kwa joto duniani kutasababisha kupanda kwa bei ya bidhaa duniani, na kunufaisha maendeleo ya kilimo nchini humo, lakini pia kutaleta athari nyingi mbaya, na kuhatarisha usalama wa chakula.

TFDA YANASA VIPODOZI HARAMU TANI 15.

Mamlaka ya Chakula na Dawa nchini TFDA imenasa vipodozi vya magendo tani 15 vyenye thamani ya shilingi milioni 400 mjini Dar es Salaam.
Bidhaa hizo  zilikuwa zimehifadhiwa kwenye ghorofa mbili zilizoko eneo la Karioakoo mjini humo.

Meneja wa TFDA Emmanuel Alphone amesema vipodozi hivyo vimeingizwa bila ya idhidi ya mamlaka husika.
Watu wanane wamekamatwa na kuhojiwa kuhusiana na bidhaa hizo na wanatarajiwa kufikishwa mahakamani.